Qazaxıstanda qaz partlayışı ilə bağlı hadisəni araşdırmaq üçün komissiya yaradılıb

Qazaxıstan fövqəladə hallar naziri general-leytenant Çingiz Arinovun əmri ilə Akmola vilayətinin Şuçinsk şəhərində baş verən fövqəladə hadisənin səbəblərini və şəraitini müəyyən etmək üçün idarələrarası komissiya yaradılıb.

Operativ Media "Kazinform"-a istinadən xəbər verir ki, bu barədə ölkənin fövqəladə hallar nazirliyi məlumat yayıb.

Komissiyaya daxili işlər, səhiyyə, əmək və sosial müdafiə, energetika, sənaye və tikinti, ədliyyə, ticarət və inteqrasiya nazirlikləri də daxil olmaqla dövlət qurumlarının rəhbərləri və Akmola vilayətinin akimliyinin nümayəndələri daxil olub.

Komissiyaya hadisənin səbəblərinin hərtərəfli, tam və obyektiv araşdırılmasını təmin etmək və oxşar hadisələrin qarşısını almaq üçün zəruri təşkilati və profilaktik tədbirlər hazırlamaq vəzifəsi həvalə edilib.

Yaralılara və mərhumun ailələrinə tibbi və psixoloji dəstək də daxil olmaqla, bütün zəruri yardım göstəriləcək.