​Fransanın "Monako" klubunun yarımmüdafiəçisi Pol Pogba komandanın məşqi zamanı zədə alıb.

​Operativ Media xəbər verir ki, bu barədə "Nice-Matin" nəşri məlumat yayıb.

​Bildirilib ki, 33 yaşlı futbolçu hazırlıq prosesində meydançaya yıxılıb. Tibbi heyətin müdaxiləsindən sonra sol bud nahiyəsi sarınan fransalı oyunçu ciddi şəkildə axsayaraq, iki klub əməkdaşının müşayiəti ilə məşqi vaxtından əvvəl tərk edib.

​Qeyd edək ki, yarımmüdafiəçi avqustun 6-da dizindəki problem səbəbindən "Xetafe"yə 1:0 hesabı ilə qalib gəldikləri yoxlama oyununu da buraxmalı olub.

​2025-ci ilin iyulunda "Monako"ya keçən təcrübəli oyunçu 2025/2026 mövsümündə 6 matçda meydana çıxsa da, məhsuldar göstəricilərlə yadda qalmayıb. Futbolçunun klubla müqaviləsi 2027-ci il iyunun 30-dək nəzərdə tutulub. "Transfermarkt" portalı onun transfer dəyərini 2,50 milyon avro qiymətləndirir.