ABŞ "Boeing" şirkəti ilə 20 milyard dollarlıq müqavilə imzalayıb

ABŞ Hərbi Nazirliyi Hərbi Dəniz Qüvvələri üçün altıncı nəsil F/A-XX qırıcı təyyarəsinin hazırlanması məqsədilə "Boeing" şirkəti ilə 20 milyard dollardan çox dəyərində müqavilə imzalayıb.

Operativ Media xəbər verir ki, bu barədə ABŞ Hərbi Nazirliyinin sentyabrın 29-da yaydığı açıqlamada bildirilib.

Müqavilə çərçivəsində təyyarənin sınaqlarının keçirilməsi üçün bir sıra prototiplərin hazırlanması nəzərdə tutulur.

ABŞ F/A-XX göyərtə əsaslı qırıcılarının gələcəkdə F/A-18E Super Hornet, F/A-18F Super Hornet və EA-18G Growler təyyarələrini əvəz etməsini planlaşdırır.

Mütəxəssislərin qiymətləndirməsinə görə, proqramın ümumi dəyəri perspektivdə yüz milyardlarla dollara çata bilər.

ABŞ Müdafiə nazirinin müavini Maykl Daffi F/A-XX qırıcılarının istifadəsinin Amerika hərbçilərinə “həlledici döyüş üstünlüyü” təmin edəcəyini bildirib.

Müqavilənin əldə olunması uğrunda Northrop Grumman korporasiyası da mübarizə aparıb.

Qeyd edək ki, Pentaqon 2025-ci ildə ABŞ Hərbi Hava Qüvvələri üçün altıncı nəsil F-47 qırıcısının hazırlanmasını da Boeing şirkətinə həvalə edib.