"İsrailin Azərbaycanda böyük iqtisadi marağı var"
Bunu "Operativ Media"ya açıqlamasında millət vəkili Arzu Nağıyev bildirib.
Millət vəkilinin sözlərinə görə, Azərbaycanla İsrail arasındakı münasibətlər ilk günlərdən yaxşı olub.
"Əsas məqam ondan ibarətdir ki, bu İranı və Ermənistanı narahat edən məsələ idi. Dərinə gedəndə, görürsünüz ki, İranla İsrail arasında münaqişə olmayıb. Hətta İranın xüsusi təyinatlılarını da İsrail yetişdirib. Sadəcə olaraq rejimin İsraillə münasibətləri yaxşı deyil. İsrailin prezidentinin və birinci xanımının Azərbaycana gəlməsi və prezident İlham Əliyevin və Mehriban Əliyevanın onları qəbul etməsi münasibətlərimizə daha da güc verdi" - deyə millət vəkili bildirib.
Arzu Nağıyev bəyanatlarda xüsusi diqqət çəkən məqamların olduğunu qeyd edib.
"Birgə bəyanatlar mühüm əhəmiyyət kəsb edir. Yəhudi və müsəlman ölkələrinin münasibətlərində də bir etalon ola bilər. Bağlanan müqavilələrə baxdıqa görürük ki, elmi müqavilələr, su ilə bağlı müqavilələr, hərbi əməkdaşlıq daha da inkişaf edəcək"
Millət vəkili iki ölkə arasındakı əməkdaşlığın hərbi müstəvi ilə yanaşı iqtisadi önəmindən də danışıb. "Bizim geosiyasi vəziyyətimiz elədir ki, vasitəçilik missiyasını üzərimizə götürə bilərik. Azərbaycanın istər İranla, istərsə də Rusiya ilə sərhədi olduğundan siyasi məsələlərin həllində rolu danılmazdır. Eyni zamanda İsrail iqtisadi maraqlarını genişləndirmək istəyir. Bu gün biz cənubi Qafqazda şimal cənub dəhlizini bir formalaşdıran ölkəyik .Ona görə də burada İsrailin böyük iqtisadi maraqları var"-deyə Arzu Nağıyev vurğulayıb.
Millət vəkilinin sözlərinə görə Vətən müharibəsində də İsrailin yardımı danılmazdır. Xüsusilə yəhudi icmasının xeyli yardımları olub.
"44 günlük müharibədə axırıncı postlara qədər edilən yardımlarda yəhudi icmasının böyük rolu oldu. Onlar əsgərlər olan yardımlarda Azərbaycan vətəndaşları kimi böyük əmək sərf etdilər"-deyə Arzu Nağıyev bildirib.
