Rusiya XİN Estoniyanın rusların səsvermə hüququnu məhdudlaşdırmaq planlarını pisləyib

Moskva beynəlxalq qurumları Estoniyanın Rusiya və Belarus əsilli vətəndaşlarının yerli seçkilərdə səsvermə hüququnu məhdudlaşdırmaq planlarını pisləməyə çağırıb.

"Operativ Media" xəbər verir ki, bu barədə Rusiya Xarici İşlər Nazirliyinin sözçüsü Mariya Zaxarova açıqlama verib.

Diplomat Tallinin təşəbbüsünü şərh edərkən qeyd edib: "Biz vəziyyəti diqqətlə izləyəcəyik, müvafiq beynəlxalq qurumların Estoniya hakimiyyətinin açıq-aşkar irqçi planlarını pisləməsinə və onların həyata keçirilməsinin qarşısını almasına əmin olacağıq".

“Müvafiq qanun layihəsi Estoniyanın baş naziri Kaja Kallasın partiyası tərəfindən irəli sürüldüyünə görə, çox güman ki, parlamentdən keçəcək”, - diplomat qeyd edib.

Zaxarova Birləşmiş Millətlər Təşkilatının İnsan Hüquqları Şurasının etnik azlıqlar, mədəni hüquqlar və təhsil hüququ üzrə xüsusi məruzəçilərinin Tallinin insan haqları pozuntularını nəzərə almağa məcbur olduğunu vurğulayıb. 

"Onların son hesabatı Estoniya hakimiyyətinin etnik azlıqlara öz ana dilindən istifadə etmələri baxımından ayrı-seçkilik etdiyini açıq şəkildə göstərir", - rus diplomat əlavə edib.