Oturaq iş şəraiti, kalorisi çox olan yeməklər, qeyri-düzgün qidalanma rejimi nəticəsində artıq çəki problemindən şikayətlənənlərin sayı çoxalıb. Bir çoxu bunu həllini diyeta ilə, bəziləri isə idman zallarına gedərək həll etməyə çalışırlar. Lakin, bir qisim kütlə isə istənmədən toplanılan həmin kilolardan arıqlama üçün nəzərdə tutulan mobil tətbiqlər vasitəsilə azad olmağa çalışırlar. Belə mobil tətbiqlərdən istifadə edərək bədənin istənilən nahiyyəsini əritmək və hətta kökəltmək mümkündür. Bu idman hərəkətlərini yerinə yetirmək üçün isə mütləq şəkildə idman alətlərinizin olması vacib deyil.
Bəs belə mobil tətbiqlər, həqiqətən də, effektivdir?
Mövzu ilə əlaqədar treyner Şıxəli Mərdanlı “Operativ Media”ya açıqlamasında bildirib ki, bu tətbiqlərin düzgün istifadəsi zamanı insanlar müəyyən qədər nəticə əldə edə bilərlər.
Onun sözlərinə görə, həmin mobil proqramlar məşqçinin individual şəkildə verdiyi və tətbiq etdiyi proqramlardan üstün ola bilməz:
“Bir çox insanın evlərində özlərinə məxsus zalları olur və yaxud hər hansısa bir idman alətləri olur. Həmçinin idman hərəkətlərindən ibarət olan tətbiqlər və buna uyğun qidalanma proqramları var ki, insanlar bunları yükləyərək istifadə edirlər. Əlbəttə ki, bu tətbiqlərin düzgün istifadəsi zamanı nəticə əldə etməm mümkündür, amma burada həmin mobil aplikeyşnların hansı üslubda yığılmağı və nə dərəcədə düzgün proqramlaşdırma aparmasının da rolu var. Bəzi tətbiqlərin daxilində müəyyən ödənişli hissələr olur ki, ödəmədiyiniz təqdirdə o hərəkətləri və pəhrizləri tam olaraq görmək hüququndan məhdud olursunuz. Bəzilərində isə boy, çəki qeyd edirsiniz və göstərilən müəyyən bədən şəkillərinə çatmaq üçün bir hədəfiniz olur. Proqram isə buna uyğun olaraq sizə həm qidalanma, həm də hərəkətlərdən ibarət məşq sistemi hazırlayır. Ancaq bu üsul nə qədər də kömək olsa da, individual şəkildə məşqçinin verdiyi və tətbiq etdiyi proqramlardan üstün ola bilməz, fərdi şəkildə qurulmuş pəhriz proqramı hər zaman mobil tətbiqdən bir addım daha öndədir”.
Sevinc İbrahimzadə
