Marketdə istifadə müddəti bitmiş müxtəlif növ qida məhsulları aşkarlanıb

Marketdə istifadə müddəti bitmiş müxtəlif növ qida məhsulları aşkarlanıb.

"Operativ Media" xəbər verir ki, bu barədə Azərbaycan Qida Təhlükəsizliyi Agentliyindən (AQTA)məlumat verilib.

Bildirilib ki, Agentlik əməkdaşları Lənkəran rayonunun Cil kəndində fəaliyyət göstərən Kamal Mirzaid oğlu Xamiyevə məxsus “Cil” marketdə plandankənar yoxlama keçirib. Baxış zamanı qida təhlükəsizliyi sahəsində normativ hüquqi aktların tələblərinin pozulduğu məlum olub. Belə ki, marketdə 60 adda ümumi çəkisi 74 kq müxtəlif əmtəə nişanlı şirniyyat, ədviyyat, süd məhsulunun və 30 litr alkoqolsuz içkinin istifadə müddətinin bitdiyi müəyyən edilib, eləcə də etiket məlumatlarında uyğunsuzluq olan ümumi çəkisi 60 litr duru yağ və istehlaka yararsız müxtəlif növ qida məhsulları aşkarlanıb.

Faktla bağlı qanunvericiliyə uyğun olaraq, sahibkar barəsində protokol tərtib edilib, istehlaka yararsız məhsulların satışının qarşısı alınıb və məhv edilməsinə dair qərar qəbul olunub.