Azad edilmiş ərazilərdə yaşıl texnologiyaların tətbiqi ilə bağlı İşçi Qrupun növbəti iclası keçirilib

Energetika naziri Pərviz Şahbazovun sədrliyi ilə Azərbaycanın işğaldan azad edilmiş ərazilərində yaşıl texnologiyaların və enerji səmərəliliyi tələblərinin tətbiqi ilə bağlı əlaqələndirmə və monitorinq üzrə İşçi Qrupun 4-cü iclası hibrid formatda keçirilib.

Nazirlikdən "Operativ Media"ya verilən məlumata görə, iclasda İşçi Qrup qarşısında qoyulmuş vəzifələrə uyğun olaraq görülən işlərin gedişi müzakirə olunub. Ötən iclasda qəbul edilmiş qərarlara dair icra edilmiş tapşırıqlar barədə katibliyin hesabatı dinlənilib, tamamlanan və icrası davam edən işlər barədə məlumat verilib.

Regionda bərpa olunan enerji mənbələrinin potensialını və enerji səmərəliliyi həllərini təbliğ edəcək Yaşıl Enerji Zonası Nümayiş Pavilyonunun yaradılması və yaşıl texnologiyaların tətbiqi üzrə pilot layihələrin həyata keçirilməsi istiqamətində fikir mübadiləsi aparılıb.

Ekoloji cəhətdən təmiz texnologiyaların və enerji səmərəliliyinin tətbiqi üzrə monitorinqin İcra Qrafikinə uyğun olaraq davam etdirilməsi və mütəmadi olaraq İşçi Qrupun iclaslarında məruzə edilməsi qərara alınıb.

İşçi Qrupuna daxil olan dövlət qurumlarının, Azərbaycan Prezidentinin xüsusi nümayəndəliklərinin, digər dövlət müəssisəsi və Yaponiyanın “TEPSCO” şirkətinin nümayəndələrinin iştirakı ilə keçirilmiş iclas qərar layihəsinin qəbulu ilə yekunlaşıb.