Qəzzaya Humanitar Yardım Fondu fəaliyyətini dayandırıb

ABŞ və İsrail hakimiyyət orqanları tərəfindən dəstəklənən Qəzza Humanitar Fondu (GHF) fəaliyyətini dayandırıb.

Operativ Media xəbər verir ki, bu barədə Fondun mətbuat xidməti məlumat yayıb.

"Əməliyyatlarımızı dayandırarkən uyğunlaşma, yerli əməkdaşlıq və hesabatlılığın münaqişə zonalarında humanitar yardımı necə yenidən müəyyənləşdirə biləcəyinə dair sübut edilmiş bir modeli geridə qoyuruq", – GHF sosial şəbəkələrdə yayılan bəyanatında qeyd edib.

Fondun məlumatına görə, dörd ay yarım ərzində GHF Qəzzaya 187 milyon yemək çatdırıb və onların anklav sakinlərinə paylanmasını təmin edib.

Mart ayından iyulun sonuna qədər İsrail hakimiyyəti beynəlxalq humanitar yardımın Qəzza zolağına çatmasına mane olub və bütün keçid məntəqələrini bağlayıb. Sakinlərə ərzaq paylanması Qəzza Humanitar Fondu (GHF) vasitəsilə həyata keçirilib. BMT, fondun fəaliyyətə başlamasından sonra humanitar yardım almağa cəhd edən təxminən 2 000 fələstinlinin həlak olduğunu bildirib. Rusiyanın BMT-dəki daimi nümayəndəsinin birinci müavini Dmitri Polyanski avqust ayında qeyd edib ki, GHF-nin fəaliyyəti humanitar missiya kimi qiymətləndirilə bilməz, çünki fond mülki əhalinin qorxudulması və repressiyaya məruz qalması üçün bir pərdə rolunu oynayır.