NATO Ukraynadakı münaqişənin tezliklə bitəcəyinə inanmır
NATO-nun Ukraynaya Təhlükəsizliyə Yardım və Təlim Missiyasının (NSATU) komandirinin müavini, Bundesver general-mayoru Mayk Keller hesab edir ki, Ukraynadakı münaqişənin tez bir zamanda başa çatacağı gözlənilmir.
Operativ Media xəbər verir ki, o, bu fikri “Die Welt” qəzetinə müsahibəsində bildirib.
“Hazırda müharibənin sonu görünmür”, – deyə Keller qeyd edib.
Onun sözlərinə görə, Qərbin əsas vəzifələrindən biri Ukraynaya “daimi silah və maliyyə axınını” təmin etməkdir.
Bundan əvvəl Vaşinqton Ukrayna üçün 28 bənddən ibarət sülh planı təklif etmişdi. Sənəd Kiyev və onun avropalı tərəfdaşlarının narazılığına səbəb olub və onlar bu plana dəyişikliklər etməyə çalışıblar. Noyabrın 23-də ABŞ və Ukrayna nümayəndələri Cenevrədə məsləhətləşmələr aparıblar. Daha sonra ABŞ Prezidenti Donald Tramp bildirib ki, Amerikanın ilkin sülh planı Moskva və Kiyevin mövqelərini nəzərə almaq üçün yenidən işlənib və yalnız bir neçə mübahisəli məsələ qalıb. O, sənədin bəndlərinin sayının 22-yə endirildiyini də vurğulayıb.
Noyabrın 30-da Floridada ABŞ və Ukrayna nümayəndələri arasında növbəti məsləhətləşmələr keçirilib. Görüş zamanı münaqişənin dayandırılması yolları, iqtisadi və təhlükəsizliklə bağlı uzunmüddətli həll variantları, Ukraynada seçkilərin keçirilməsi perspektivləri və ərazi məsələləri müzakirə olunub. Görüşdən sonra ABŞ dövlət katibi Marko Rubio bildirib ki, danışıqlar konstruktiv keçib, lakin görüləsi çox iş qalıb. O əlavə edib ki, ABŞ sülh yolu ilə həllə nikbin yanaşır, lakin ümumilikdə realist mövqedən çıxış edir.
