AQTA ev quşlarının tələfatı ilə bağlı araşdırmalar aparıb
“Mediada ev quşlarının tələfatı ilə bağlı yayılan məlumatlar əsasında Azərbaycan Qida Təhlükəsizliyi Agentliyinin (AQTA) regional bölmələri tərəfindən müvafiq ərazilərdə araşdırmalar aparılıb”.
Bu barədə Operativ Media-nın sorğusuna cavab olaraq AQTA-dan bildirilib.
Qeyd olunub ki, Tovuz rayonunun Bayramlı kəndində yerləşən bir neçə ailə təsərrüfatına Qazax-Tovuz Regional Bölməsinin əməkdaşları tərəfindən baxış keçirilib. Araşdırma zamanı iki təsərrüfatda təxminən 10 gün əvvəl az sayda toyuğun tələf olduğu, quş cəsədlərinin sahiblər tərəfindən zərərsizləşdirildiyi müəyyən edilib:
“Baxış zamanı xəstəlik əlamətləri müşahidə olunan quşlara rast gəlinməyib.
Həmçinin Salyan rayonunun Xalac kəndində yerləşən təsərrüfata Şirvan-Salyan Regional Bölməsinin əməkdaşları tərəfindən baxış keçirilib. Təsərrüfatda 1 baş ölü quş cəsədi aşkar olunaraq diaqnostik müayinə üçün AQTİ-nin Mərkəzi Baytarlıq Laboratoriyasına göndərilib. Digər ev quşları klinik sağlam qiymətləndirilib, saxlanma yerlərində dezinfeksiya işləri aparılıb.
Təsərrüfatlar nəzarətə götürülüb və sahibkarlara müvafiq tövsiyələr verilib”.
