Xarici dil fənləri üzrə imtahan modelinin növbəti təqdimatı keçirilib

25 may 2026-cı il tarixində Dövlət İmtahan Mərkəzində tam orta təhsil səviyyəsində xarici dil fənləri üzrə təkmilləşdirilmiş imtahan modelinin növbəti təqdimatı keçirilib. Tədbirdə öncədən qeydiyyatdan keçmiş xarici dil mütəxəssisləri iştirak ediblər.

Operativ Media xəbər verir ki, bu barədə DİM məlumat yayıb.

DİM-in Dövlət dili və xarici dillər üzrə şöbəsinin müdiri Könül Hacıyeva bildirib ki, yenilənmiş imtahan modelinin əsas məqsədi şagirdlərin dil bacarıqlarını daha real və kommunikativ mühitə uyğun şəkildə qiymətləndirməkdir.

Dövlət dili və xarici dillər üzrə şöbənin əməkdaşı Nəzrin Kərimova 2021–2026-cı illər ərzində ümumi orta və tam orta təhsil səviyyələri üzrə buraxılış imtahanlarında xarici dillər üzrə nisbi bal göstəricilərini, açıq test tapşırıqlarının cavablandırılmasında imtina faizlərini, həmçinin ümumi orta təhsil səviyyəsi üzrə açıq və qapalı tipli test tapşırıqlarının cavablandırılması əsasında formalaşan nisbi bal statistikasını təqdim edib. O, açıq tipli tapşırıqların şagirdlərin real dil bacarıqlarını üzə çıxarmaq baxımından əhəmiyyətini vurğulayıb. Bu baxımdan tam orta təhsil səviyyəsi üzrə imtahan modelinə yazılı tapşırığın əlavə olunmasının xüsusi əhəmiyyət daşıdığı qeyd edilib. Həmçinin təkmilləşdirilmiş modellə bağlı keçirilmiş pilot imtahan və onun nəticələri barədə ümumi məlumat verilib.

Daha sonra K.Hacıyeva tədbir iştirakçılarının diqqətinə çatdırıb ki, yeni modelə əsasən, 2027-ci ildən etibarən şagirdlərdən minimum 100 sözdən ibarət kiçik həcmli mətn – paraqraf yazmaları tələb olunacaq. O, pilot imtahanda yazı bloku üzrə təqdim edilmiş tapşırığın mahiyyəti, yazılma qaydaları, əsas xüsusiyyətləri və tərkib hissələri barədə məlumat verib, uğurlu və uğursuz paraqraf nümunələrini və onları xarakterizə edən xüsusiyyətləri iştirakçılara təqdim edib. Bildirilib ki, dərsliklərdə paraqraf və onun növlərinə aid tapşırıqlara kifayət qədər yer ayrılıb.

Qeyd olunub ki, bu yanaşma şagirdlərin yazı bacarıqlarını, fikirlərini ardıcıl və məntiqli şəkildə ifadə etmək imkanlarını, eləcə də dil vasitələrindən istifadə səviyyəsini daha obyektiv qiymətləndirməyə şərait yaradacaq. Eyni zamanda vurğulanıb ki, bu dəyişiklik tədris prosesində yazı bacarıqlarının inkişafına daha çox diqqət yetirilməsini zəruri edir.

Dövlət dili və xarici dillər üzrə şöbənin digər əməkdaşı Gülayə Cavadova isə oxu mətnləri üzrə dörd sual tipi ilə bağlı ümumi tövsiyələri bölüşüb, həmçinin yazı işlərinin qiymətləndirmə meyarlarını və pilot layihədən götürülmüş nümunə cavabları tədbir iştirakçılarına təqdim edib.

Tədbirin sonunda iştirakçıları maraqlandıran suallar cavablandırılıb və yeniliklərlə bağlı fikir mübadiləsi aparılıb.