Yaponiya Yəməndəki vəziyyətdən narahatlığını açıqlayıb

Yaponiya Yəməndəki vəziyyətdən və Bab əl-Məndəb boğazında gəmiçilik azadlığına yaranan təhlükədən narahatdır.

Operativ Media xəbər verir ki, bu barədə Yaponiyanın xarici işlər naziri Toşimitsu Motegi ilə Yəmənin xarici işlər qurumunun rəhbəri Afrah əz-Zuba arasında telefon danışığı zamanı bildirilib.

Yaponiya XİN-in məlumatına görə, Motegi husilərin fəaliyyətinin Bab əl-Məndəb boğazı və Qırmızı dəniz də daxil olmaqla, bütün regionda vəziyyəti sabitsizləşdirdiyini və boğazda gəmiçilik azadlığı və təhlükəsizliyi üçün ciddi təhdid yaratdığını qeyd edib.

Tərəflər Yəməndə və Bab əl-Məndəb boğazı ətrafında sabitliyin beynəlxalq ictimaiyyət, o cümlədən enerji təhlükəsizliyi baxımından mühüm əhəmiyyət daşıdığını vurğulayıblar.

Yaponiyanın xarici işlər naziri ölkəsinin İrandan husiləri təmkin nümayiş etdirməyə çağırmağı tələb etdiyini bildirib.

Yəməndə vəziyyət sentyabrın əvvəlində kəskin şəkildə gərginləşib. Husilər ölkənin cənub-qərbində hücuma keçib, paralel olaraq Qırmızı dənizin sahilyanı ərazilərinə və Taiz şəhəri ətrafına raket və pilotsuz uçuş aparatları ilə zərbələr endirməyə başlayıblar.

Husilərin məqsədinin Moha istiqamətindəki yolları kəsmək və strateji əhəmiyyət daşıyan Bab əl-Məndəb boğazına yaxın ərazilərə doğru irəliləmək olduğu bildirilib.