Azərbaycan və Qazaxıstanın məhkəmə ekspertizası mərkəzləri arasında Anlaşma Memorandumu imzalanıb

Qazaxıstan Respublikasının Astana şəhərində məhkəmə ekspertizası sisteminin yaradılmasının 75 illiyinə həsr olunmuş “Məhkəmə ekspertizası ədalət mühakiməsi sistemində: çağırışlar və perspektivlər” mövzusunda beynəlxalq elmi-praktik konfrans çərçivəsində Azərbaycan Respublikası Ədliyyə Nazirliyinin Məhkəmə Ekspertizası Mərkəzi ilə Qazaxıstan Respublikası Ədliyyə Nazirliyinin Məhkəmə Ekspertizası Mərkəzi arasında əməkdaşlığa dair Anlaşma Memorandumu imzalanıb.

Bu barədə Operativ Media-ya Ədliyyə Nazirliyindən məlumat verilib.

Memorandum iki ölkənin məhkəmə ekspertizası qurumları arasında əməkdaşlığın daha da möhkəmləndirilməsinə, elmi və peşəkar təcrübə mübadiləsinin genişləndirilməsinə, habelə yüksək ixtisaslı ekspert kadrlarının hazırlanmasına xidmət edir.

Əməkdaşlıq çərçivəsində, həmçinin birgə seminar, konfrans və digər elmi tədbirlərin keçirilməsi, elmi və elmi-metodiki işlərin dərc edilməsi, qarşılıqlı məsləhət və praktiki yardımın göstərilməsi, elmi tədqiqatların nəticələrinin məhkəmə ekspertizası təcrübəsində və kadr hazırlığı prosesində tətbiqi nəzərdə tutulur.

Anlaşma Memorandumunun imzalanması Azərbaycan və Qazaxıstanın məhkəmə ekspertizası qurumları arasında qarşılıqlı faydalı əməkdaşlığın daha da inkişaf etdirilməsinə və birgə elmi-praktiki təşəbbüslərin həyata keçirilməsinə mühüm töhfə verəcək.