Hindistan ABŞ-nin sanksiyalarına qarşı tədbirlər görəcək

Hindistan ABŞ Konqresinin Rusiya və İrana qarşı sanksiyaları nəzərdə tutan qanun layihəsini qəbul etməsindən sonra öz maraqlarını qorumaq üçün bütün zəruri tədbirləri görəcəyini açıqlayıb.

Operativ Media xəbər verir ki, Hindistan Xarici İşlər Nazirliyi ABŞ Konqresində sənədin qəbul edilməsini nəzərə aldıqlarını və bununla bağlı sonrakı inkişafları izlədiklərini bildirib.

Nazirlik ölkənin 1,4 milyard nəfər əhalisinin enerji təhlükəsizliyinin təmin edilməsinə sadiq qaldığını vurğulayıb. Bildirilib ki, Hindistan dəyişən bazar şərtlərini nəzərə almaqla enerji tədarükü mənbələrini şaxələndirməyə davam edəcək.

Hindistan tərəfi son aylarda bu məsələni ABŞ nümayəndələri ilə yüksək səviyyədə müzakirə edib. Rəsmi Dehli mümkün tədbirlərin həm iki ölkə arasındakı münasibətlərə, həm də beynəlxalq enerji bazarına təsir göstərə biləcəyini qarşı tərəfə çatdırıb.

Xarici İşlər Nazirliyi Hindistanın ticarət və iqtisadi maraqlarını qorumaq üçün bütün zəruri addımları atmaqda qərarlı olduğunu qeyd edib.

Nazirlik əlavə edib ki, hökumət yaranan vəziyyətin nəticələrinə cavab vermək üçün ölkənin biznes və sahə üzrə təşkilatları ilə sıx əməkdaşlıq edəcək.