Azərbaycan və Böyük Britaniya arasında yeni iqtisadi imkanlar nəzərdən keçirilib

Energetika naziri Pərviz Şahbazov Böyük Britaniya və Şimali İrlandiya Birləşmiş Krallığının Biznes, İnnovasiya, Elm və Ticarət Nazirliyinin Ticarət üzrə dövlət naziri, Birgə Hökumətlərarası Komissiyanın həmsədri Lord Anas Sarvarla görüşüb.

Operativ Media xəbər verir ki, bu barədə Pərviz Şahbazov öz "X" sosial media hesabında paylaşım edib.

Məlumata görə, görüşdə ölkələr arasında ikitərəfli münasibətlərin inkişaf gündəliyindəki məsələlər, o cümlədən enerji, ticarət, investisiya, nəqliyyat, rəqəmsallaşma və digər prioritet sahələrdə əməkdaşlığın genişləndirilməsi imkanları müzakirə edilib.

"39 milyard ABŞ dollarından çox investisiya ilə Birləşmiş Krallıq Azərbaycanın ən böyük xarici investoru və əsas iqtisadi tərəfdaşlarından biridir", - nazir paylaşımda qeyd edib.