Heydər Əliyev Beynəlxalq Aeroportunun ümumi sərnişin dövriyyəsi 2 milyon 464 min nəfərdən çox olub

Bu ilin yanvar-iyun aylarında Heydər Əliyev Beynəlxalq Aeroportunun ümumi sərnişin dövriyyəsi 1,5 dəfə artaraq 2 milyon 464 min nəfərdən çox həddə çatıb.

Bu barədə "Operativ Media"ya Heydər Əliyev Beynəlxalq Aeroportunun mətbuat xidmətindən bildirilib

Məlumata görə, ötən ilin eyni dövründə bu göstərici 1 milyon 634 min nəfər təşkil edib.

Daşınan sərnişinlərin 49,82 %-i beynəlxalq aviadaşıyıcıların payına düşüb. Hesabat dövründə xarici aviaşirkətlər 1 milyon 236 mindən çox sərnişin daşıyıb ki, bu da ötən ilin müvafiq dövrü ilə müqayisədə 34 % artım deməkdir. Bakı aeroportundan sərnişin daşımalarının qalan hissəsini isə "Azərbaycan Hava Yolları" QSC (AZAL) həyata keçirib. Bu dövrdə AZAL 1 milyon 227 min nəfərdən çox sərnişinə xidmət göstərib.

Aeroportdan ən çox sərnişin Bakıdan Naxçıvana və əks istiqamətdə daşınıb. Qeyd olunan dövr ərzində bu göstərici 300 min nəfərdən çox olub. Daşınan sərnişinlərin sayına görə digər pillələrdə ardıcıl olaraq İstanbul, Tbilisi, Moskva və Dubay qərarlaşıb.

Altı ayda 57 xarici aviaşirkət Heydər Əliyev Beynəlxalq Aeroportuna müntəzəm uçuşlar həyata keçirib. Ən çox sərnişini “Turkish Airlines”, “Utair”, “Aeroflot”, “FlyDubai” və “WizzAir” aviaşirkətləri daşıyıb.