ABŞ: "Rusiya təyyarəsi pilotsuz uçuş aparatımıza təcavüz etdi"
ABŞ ordusu Rusiya döyüş təyyarəsinin Suriya səmasında uçan ABŞ pilotsuz uçuş aparatına (PUA) radardan yayınmaq üçün istifadə edilən sursatlar ataraq təcavüz etdiyini və hadisə zamanı PUA-nın zədələndiyini açıqlayıb.
"Operativ Media" xəbər verir ki, bu barədə ABŞ Hərbi Hava Qüvvələrinin Yaxın Şərqdəki 9-cu komandanı general-leytenant Aleks Qrinkeviç məlumat verib.
Qrinkeviç ABŞ-nin MQ-9 hərbi PUA-nın Suriya səmasında uçarkən Rusiyanın Su-35 qırıcısının birbaşa hücumuna məruz qaldığını, daha sonra Rusiya təyyarəsinin radarları və xüsusən də radarla idarə olunan raketləri aldatmaq üçün istifadə edilən sursatlar atdığını bildirib.
Raketin vurulması nəticəsində MQ-9-un zədələndiyini bildirən Qrinkeviç qeyd edib: "Suriyadakı Rusiya qüvvələrini bu ehtiyatsız, əsassız və peşəkar olmayan hərəkətlərə ən qısa zamanda son qoymağa çağırırıq".
