"Yuventus" maliyyə vəziyyətinə görə gənc futbolçusunu sata bilər

"Yuventus"dan icarə əsasında "Frozinone"yə göndərilən gənc futbolçu Matias Soule 2023-24 mövsümünə inanılmaz start verib.

"Operativ Media" "La Gazette Della Sport"a istinadən xəbər verir ki, argentinalı futbolçu ilə Premyer Liqa komandaları maraqlanır. Bu səbəbdən "Yuventus"un direktoru Kristiano Giuntoli yanvar transfer pəncərəsi üçün planlar hazırlamaq üçün bu həftə İngiltərəyə səfər edib. Xəbərə görə, Souleyə 25 milyon avroya qədər təklif etməyə hazırlaşan "Kristal Pelas" və "Nyukasl" oyunçunu transfer etmək üçün fürsət axtarır və "ağ-qaralar"ın bu təklifi rədd etməsi mümkün olmaya bilər.

"Yuventus" Çempionlar Liqasında oynamadığı üçün hazırda maliyyə problemi yaşayır və İtaliya nəhəngi maliyyə vəziyyətini düzəltmək üçün gənclərindən birini satmalı ola bilər ki, bu da bəzi qurbanlar tələb edə bilər. Mənbənin sözlərinə görə, Soule indiki maaşının iki qatından çoxunu təklif edən varlı klubla yeni müqavilə imzalaya bilər.