Bu əlamətdar tədbir Azərbaycanın qlobal aləmdə, xüsusilə informasiya təhlükəsizliyi və sürətlə inkişaf edən kiberdiplomatiya sahəsində artan nüfuzunu əks etdirir.

"Operativ Media" xəbər verir ki, bunu Regionda ilk dəfə Azərbaycanın ev sahibliyi etdiyi Beynəlxalq Kiberdiplomatiya Konfransında Xüsusi Rabitə və İnformasiya Təhlükəsizliyi Dövlət Xidmətinin rəisi İlqar Musayev bildirib.

"Kiberdiplomatiya üzrə ölkəmizdə keçirilən birinci beynəlxalq konfransın əsas məqsədərindən biri kibertəhlükəsizlik sahəsində beynəlxalq əməkdaşlığı daha da dərinləşdirməkdir.

Biz inanırıq ki, kibertəhdidlərlə mübarizə aparmaq, rəqəmsal infrastrukturumuzu möhkəmləndirmək və rəqəmsal sahədə fərdlərin hüquq və şəxsi məlumatlarını qorumaq üçün birgə səmərəli həll yolları tapa bilərik.

Heç bir ölkə bu çağırışları tək başına həll edə bilməz. Kibertəhdidlər sərhəd tanımır və bir kiber hücumun təsiri mənşə yerindən asılı olmayaraq bütün dünyada hiss oluna bilər. Buna görə də müttəfiqliyimizi gücləndirmək, ən yaxşı təcrübələrimizi paylaşmaq və kiberməkanla bağlı məsuliyyətli davranmaq barədə ortaq anlaşma yaratmaq vacibdir.

Eyni zamanda, kibertəhlükəsizliyin yalnız texniki məsələ olmadığını, siyasi, iqtisadi və sosial məsələ də sahib olduğunu qəbul etməliyik".