BMT: Dünya ölkələri 2050-ci ilə qədər karbon emissiyasını sıfıra endirməlidir

Dünyada temperatur rekord səviyyədə yüksəlir. Milyonlarla insan ekstremal hava hadisələri, quraqlıq və səhralaşma səbəbindən evlərini tərk edir.

Operativ Media xəbər verir ki, bu barədə BMT-nin iqlim məsələləri üzrə hesabatında bildirilib.

BMT-nin məlumatına görə, 2023-cü ildən bu yana Afrikada 159 ekstremal hava hadisəsi baş verib. Bu səbəbdən 28 mindən çox insan həyatını itirib.

Hesabatda 2023-cü ildə 26,4 milyon insan təbii fəlakətlər səbəbindən evlərini tərk etmək məcburiyyətində qaldığı qeyd olunub. Yaşadıqları ərazini tərk edən insanların əksəriyyəti Sub-Sahara Afrikası və Şərqi Asiya-Sakit Okean bölgələrində cəmləşdiyi qeyd olunub.

Quraqlıq və daşqınlar səbəbindən 2023-cü ildə Somalidə 2 milyondan çox, Keniya və Efiopiyada isə 1,2 milyon insan miqrasiya etməyə məcbur olub.

2025-ci ilin ilk aylarında şiddətli iqlim hadisələri yüz milyardlarla dollar ziyana səbəb olub. Birləşmiş Millətlər Təşkilatı bildirib ki, dünya ölkələri 2050-ci ilə qədər karbon emissiyasını sıfıra endirmək üçün daha sürətli hərəkət etməlidir.