ABŞ, Avropa və Ukrayna Kiyev üçün təhlükəsizlik təminatları üzrə komissiya yaradıb

ABŞ, Avropa və Ukrayna Kiyev üçün təhlükəsizlik təminatları ilə bağlı təklif hazırlayacaq komissiya yaradıb.

Operativ Media xəbər verir ki, bu barədə "Axios" portalı mənbələrə istinadən məlumat yayıb.

Məlumata görə, yaxın günlərdə ABŞ, Ukrayna və bir sıra Avropa ölkələrinin yüksək rütbəli rəsmilərinin Kiyev üçün təhlükəsizlik zəmanətləri ilə bağlı ətraflı təklif üzərində işləməsi gözlənilir. Portalın mənbələrinin bildirdiyinə görə, komissiyaya ABŞ dövlət katibi, Amerika prezidentinin milli təhlükəsizlik üzrə köməkçisi vəzifəsini icra edən Marko Rubio rəhbərlik edir.

Portal həmçinin qeyd edir ki, ABŞ prezidenti Donald Tramp avqustun 18-də Rusiya lideri Vladimir Putinlə telefon danışığı zamanı ərazi məsələlərini müzakirə etmək üçün onun Ukrayna prezidenti Volodimir Zelenski ilə ikitərəfli görüşünün vacibliyini vurğulayıb. Eyni zamanda, iddiaya görə, o, rusiyalı həmkarını bu məsələni müzakirə edərkən “realist olmağa” çağırıb.