UEFA Konfrans Liqasının pley-off mərhələsində səfərdə Niderlandın "Tvente" klubu ilə qarşılaşacaq "Qarabağ"ın azarkeşləri üçün vauçerlərin satışı bu gündən başlayır.

​Operativ Media klubun mətbuat xidmətinə istinadən xəbər verir ki, "FC Tvente Stadion"da keçiriləcək görüşün biletlərinin əldə olunması üçün nəzərdə tutulan vauçerlər saat 17:00-dan etibarən "iTicket.az" platformasında onlayn şəkildə satışa çıxarılacaq. Bir vauçerin qiyməti 45 manat təşkil edir.

​Alıcıların alış prosesində elektron poçt ünvanlarını düzgün daxil etmələri vacibdir, çünki oyun gününədək biletlər qeyd edilən e-mail ünvanlarına göndəriləcək. Qarşılaşmanı arenadan izləmək istəyən azarkeşlər üçün 1500 yer ayrılıb və 325-ci ilə 326-cı sektorlara giriş "Gate X" qapısı vasitəsilə həyata keçiriləcək. Stadiona daxil olarkən biletlə yanaşı şəxsiyyəti təsdiq edən sənədin də daşınması mütləqdir. Qeyd edək ki, avqustun 20-də baş tutacaq matç Bakı vaxtı ilə 22:00-da, Niderland saatı ilə isə 20:00-da start götürəcək.