Tural Məmmədov: “CIDC 2025”də kritik infrastrukturlar üzrə kiberhücumların qarşısı simulyasiyada sınaqdan keçirilir

Bu gün Bakı Konqres Mərkəzində “CIDC 2025 – Critical Infrastructure Defence Challenge” adlı kibertəhlükəsizlik tədbir dörd əsas hissədən ibarətdir. Burada 360-dan çox mütəxəssis xüsusi mövzularda təhlükəsizlik təlimləri keçirəcək. Bu təlimlər spesifik sahələri əhatə edir və adi kurslarda təqdim olunmur.

Operativ Media xəbər verir ki, bu barədə jurnalistlərə açıqlamasında Xüsusi Rabitə və İnformasiya Təhlükəsizliyi Dövlət Xidmətinin (XRİTDX) baş idarə rəisinin müavini Tural Məmmədov məlumat verib.

Onun sözlərinə görə, tədbirin birinci hissəsi müxtəlif istiqamətlər üzrə təlimlərdən ibarətdir.

“Tədbirin ikinci hissəsi informasiya təhlükəsizliyi sərgisidir. Burada kibertəhlükəsizlik sahəsində yeni texnoloji həllər, yeniliklər nümayiş etdirilir.

Üçüncü hissə isə konfransdan ibarətdir. Konfransda ağıllı şəhərlər və kritik infrastruktur mövzularında 10 təqdimat və 5 panel müzakirəsi nəzərdə tutulub. Eyni zamanda tədbir çərçivəsində “Kibermüharibə” yarışı keçirilir. Bu il yarışın mövzusu “Ağıllı şəhərlərdə kibermüharibə simulyasiyası”dır.

Tural Məmmədov bildirib ki, ölkəmizdə ağıllı şəhər və ağıllı kənd konsepsiyası inkişaf etdirilir. Bu səbəbdən simulyasiyada həmin sistemlərə qarşı mümkün kiberhücumlar, onların təsirləri və qarşısının alınması məsələləri əhatə olunub. Yarışın final mərhələsində 20 yerli və 5 xarici komanda iştirak edir.

Simulyasiya zamanı hava, torpaq və dənizdə kritik infrastruktur obyektləri üzrə hücumların qarşısının alınması sınaqdan keçirilir. Hava nəqliyyatı sistemlərinin, hava limanları, taksi və ödəniş məntəqələrinin, nəqliyyatın intellektual idarə olunması, ağıllı evlərin və yol hərəkəti idarəetmə sistemlərinin, həmçinin dənizdə neft daşları və hasilat proseslərinin təhlükəsizliyi üzrə məşğələlər təşkil olunub.

XRİTDX rəsmisinin sözlərinə görə, tədbirin keçirilməsi bu sahədə maarifləndirmə, təcrübə mübadiləsi və beynəlxalq əməkdaşlığın gücləndirilməsinə xidmət edir.