Nazirlər Kabinetinin son qərarı taksi qiymətlərinə necə təsir edəcək? - AÇIQLAMA

Xəbər verdiyimiz kimi, Nazirlər Kabineti taksi minik avtomobilləri ilə sərnişin daşımaları üçün icazələrin əlavələrinin sayına məhdudiyyətlər tətbiq edilməsi haqqında qərar qəbul edib.

Qərara əsasən, Bakı şəhərinin inzibati ərazi vahidi üzrə taksi minik avtomobilləri ilə sərnişin daşımaları üçün verilən icazələrin əlavələrinin say həddi 25 000 müəyyən edilib.

Bəs bu qərar taksi qiymətlərinə necə təsir edəcək?

Məsələ ilə bağlı Operativ Media-ya nəqliyyat eksperti Elməddin Muradlı danışıb.

O bildirib ki, taksi xidmətlərində qiymətlərin tənzimlənməsi üçün dövlət tərəfindən müəyyən mexanizmlərin hazırlanmasına ehtiyac var:

“Zaman-zaman bu barədə təkliflər səslənir. Lakin hazırda bu istiqamətdə rəsmi addım atılmayıb. Buna görə də yaxın dövrdə qiymətlərin artıb-artmayacağını zaman göstərəcək. Bu, nəqliyyat islahatları ilə bağlı bir məsələdir.

Ümumilikdə, taksi xidmətlərinin qiyməti yanacaq xərcləri, sürücülərin əməkhaqqı, avtomobilin saxlanma və texniki xidmət xərcləri, həmçinin rəqəmsal platformaların komissiya haqları ilə müəyyən olunur. Beləliklə, qiymət artımı yalnız iqtisadi deyil, həm də idarəetmə və xidmət keyfiyyəti ilə bağlı kompleks bir məsələdir”.

"Buna görə də yaxın dövrdə qiymətlərin artıb-artmayacağı bazarın öz dinamikasından və operator şirkətlərin qərarlarından asılı olacaq", - o qeyd edib.
 

Ayşən Sadıxzadə