KİV: Mbappe "Real Madrid"dən ayrılmağı planlaşdırır

Kilyan Mbappenin “Real Madrid”dəki gələcəyi ilk dəfə olaraq sual altına düşüb.

Operativ Media “El Nacional” nəşrinə istinadən xəbər verir ki, fransız hücumçu komanda yoldaşlarına bildirib ki, əgər “kral klubu” layihənin inkişafında açıq-aydın irəliləyiş nümayiş etdirməsə, yayda komandadan ayrılma ehtimalını istisna etmir.

Bildirilir ki, Mbappe son aylarda klubun idman rəhbərliyindən artan narazılığını ifadə edib. Fransız futbolçu Avropaya hökm edə biləcək bir layihənin lideri olacağına ümid edirdi. Lakin mənbənin iddiasına görə, o, gözlənilən inkişaf tempini görmür.

Mbappe “Real Madrid”ə keçidi əsas titulların, xüsusilə UEFA Çempionlar Liqasının qazanılması və “Qızıl top” uğrunda mübarizədə mövqeyinin möhkəmləndirilməsi baxımından mühüm addım kimi qiymətləndirirdi. Mövsüm əhəmiyyətli kuboklar olmadan başa çatacağı təqdirdə, onun planlarına yenidən baxması ehtimalı artacaq.

Hazırda yekun qərar verilməyib. Hər şey mövsümün nəticələrindən asılı olacaq. “Real Madrid” isə sakitliyini qoruyur, lakin anlayır ki, bu səviyyəli futbolçunu komandada saxlamağın əsas yolu uğurlu nəticələrdir.