Bakı-Salyan yolunda ağır yol-nəqliyyat hadisəsi baş verib - YENİLƏNİB

Bakı-Salyan yolunun 29-cu kilometrliyində baş vermiş ağır yol-nəqliyyat hadisəsində ölənlərin sayı artıb.

"Operativ Media" xəbər verir ki, 2020-ci il təvəllüdlü Bayxan Bağırov müalicə aldığı xəstəxanada dünyasını dəyişib.

20:34

Bakı-Salyan yolunun 29-cu km-də ölümlə nəticələnən ağır yol-nəqliyyat hadisəsi baş verib.

"Operativ Media" xəbər verir ki, bu barədə Baş Dövlət Yol Polisi İdarəsinin şöbə rəisi Rövşən Tağıyev məlumat verib. 

Məlumatda bildirilir ki, “Hyundai Accent” markalı 99-TN-320 dövlət nömrə nişanlı avtomobil xarab olaraq yolun kənarında dayanıb. Eyni istiqamətdə hərəkətdə olan “KamAZ” markalı 42-BM-084 dövlət nömrə nişanlı avtomobil ona çırpılıb. Hadisə nəticəsində “Hyundai Accent” avtomobilində olan üç nəfər qadın sərnişin həlak olub. Sürücü, daha 1 nəfər qadın sərnişin və 1 azyaşlı uşaq isə xəsarət alıb.
Faktla bağlı araşdırma aparılır.

 

***

17:01

Ələt-Astara avtomobil yolunun Salyan rayonunun Kürsəngi kəndindən keçən hissəsində ağır yol-nəqliyyat hadisəsi baş verib.

"Operativ Media" xəbər verir ki, bu barədə jurnalist Emil Məmmədov məlumat yayıb.

O bildirib ki, yolun kənarında dayanmış "Hyundai" markalı minik avtomobilinin üzərinə "KamAz" markalı yük avtomobili çıxıb.

Nəticədə minik maşınında olan üç nəfər Neftçala sakini aldığı xəsarətlərdən yerindəcə dünyasını dəyişib.