Vinisius Junior "Real Madrid"in yeni müqavilə təklifini rədd edib
İspaniyanın "Real Madrid" klubunun hücumçusu Vinisius Junior komandasının yeni müqavilə təklifini qəbul etməyib.
Operativ Media xəbər verir ki, bu barədə "El Larguero" nəşri məlumat yayıb.
İddia olunur ki, Madrid təmsilçisi 26 yaşlı braziliyalı futbolçuya ili 22 milyon avro maaş olmaqla 2031-ci ilə qədər nəzərdə tutulan yeni sözləşmə təklif edib. Tərəflərin nümayəndələri arasında növbəti görüşün bu çərşənbə günü keçiriləcəyi bildirilir.
Məlumata görə, dünya çempionatından sonra "Real"ın yeni baş məşqçisi Joze Mourinyo şəxsən Vinisiusa ona bel bağladığını çatdırıb və mütəxəssislə hücumçu arasında çox yaxşı münasibətlər mövcuddur.
Qeyd edək ki, 2018-ci ilin yayından "Real"da çıxış edən Vinisiusun mövcud müqaviləsinin müddəti 2027-ci ilin yayına qədərdir.
"Transfermarkt" portalı onun transfer dəyərini 140 milyon avro qiymətləndirir. Braziliyalı forvard 2025/2026 mövsümündə bütün turnirlərdə keçirdiyi 53 matçda 22 qol və 14 məhsuldar ötürmə ilə yadda qalıb, DÇ-2026-da isə meydana çıxdığı 5 qarşılaşmada 4 qol vurub və 1 məhsuldar ötürmə müəllifi olub.
