İngiltərə Futbol Assosiasiyasının rəhbəri İnfantinodan izahat istəyib

İngiltərə Futbol Assosiasiyasının rəhbəri və FİFA-nın vitse-prezidenti Debbi Hyuit 2026-cı il dünya çempionatında ABŞ millisinin hücumçusu Folarin Balogunun diskvalifikasiyasının ləğv edilməsinə görə Canni İnfantinodan izahat tələb edib.

Operativ Media xəbər verir ki, bu barədə BBC məlumat yayıb.

Məlumata görə, Hyuit İnfantinodan dünya çempionatlarının keçirilməsi hüquqlarının bir hissəsinin satılması ilə bağlı planlarına dair sənədlərin də açıqlanmasını istəyib.

İnfantinoya göndərilən məktubun surəti FİFA-nın baş katibi Mattias Qrafströmə də təqdim olunub. Məktubda təşkilatın korporativ mədəniyyətinin zəiflədiyi və idarəetmənin səmərəsiz olduğu barədə ittihamların yer aldığı bildirilib.

İnfantinodan Hyuitin müraciətinə oktyabrın 15-dək yazılı cavab verməsi tələb olunur. Həmin tarixdə FİFA Şurasının növbəti iclası keçiriləcək.

Qeyd edək ki, 2026-cı il dünya çempionatında FİFA-nın İntizam Komitəsi ABŞ millisinin Bosniya və Herseqovinaya qarşı 1/16 final oyununda (2:0) qırmızı vərəqə alan Balogunun diskvalifikasiyasını dayandırıb. Bundan sonra futbolçu 1/8 finalda Belçikaya qarşı keçirilən və ABŞ-nin 1:4 hesabı ilə uduzduğu görüşdə iştirak edib.

İyul ayında İnfantino təşkilatın əsas kişi və qadın turnirlərinə nəzarət edəcək FIFA Forward Enterprise şirkətinin yaradılmasını planlaşdırıb. O, həmçinin dünya çempionatlarının keçirilməsi hüquqlarının bir hissəsinin özəl investorlara satılmasını dəstəkləyib.

FİFA layihənin 4,2 milyard ABŞ dolları gəlir gətirə biləcəyini açıqlayıb. Təşəbbüsə UEFA, KONKAKAF, Asiya Futbol Konfederasiyası və KONMEBOL qarşı çıxıb.

Daha sonra 56 yaşlı İnfantino layihədən imtina edib. Buna baxmayaraq, UEFA onunla bağlı etimadın itdiyini açıqlayıb, bir sıra Avropa ölkələrinin futbol federasiyaları isə İnfantinoya dəstəklərini geri çəkiblər.