Kriştiano Ronaldo Portuqaliya millisinin düşərgəsini tərk edib

Kriştiano Ronaldo Portuqaliya millisinin düşərgəsini tərk edərək şəxsi təyyarə ilə Madridə yollanacaq.

Operativ Media xəbər verir ki, bu barədə "Marca" nəşri məlumat yayıb. Bildirilir ki, komandanın kapitanı baş məşqçi Jorje Jesusun onun Norveç və Danimarkaya qarşı oyunlarda iştirakı ilə bağlı açıqlamalarından sonra düşərgədən ayrılıb.

Məlumata görə, Ronaldo Kopenhagendəki “Parken” stadionunu Portuqaliya Futbol Federasiyasına məxsus qara rəngli mikroavtobusla tərk edib. Onun UEFA Millətlər Liqasındakı fasiləni vaxtından əvvəl başa vurduğu bildirilir.

Jorje Jesus daha əvvəl Ronaldonun məşq prosesində problem yaşamadığını açıqlamışdı. O, futbolçunun əvvəlki gün fərdi şəkildə məşq etdiyini və bu gün komanda ilə hazırlıq keçəcəyini bildirmişdi.

Baş məşqçi Ronaldo ilə görüşdüyünü də təsdiqləyib və heyətin müəyyənləşdirilməsi ilə bağlı qərarların yalnız onun səlahiyyətində olduğunu vurğulayıb.

Jesus bildirib ki, Ronaldo ehtiyac yaranacağı halda oyunun gedişində meydana buraxıla bilər, lakin heç bir futbolçu onun qərarına təsir göstərə bilməz.

Hadisələrin Norveçlə keçirilən qarşılaşmadan sonra gərginləşdiyi qeyd olunur. Osloda baş tutan və Portuqaliyanın 2:1 hesablı qələbəsi ilə yekunlaşan oyunda Ronaldo ehtiyatda qalıb. Jorje Jesus hücum xəttində Joau Feliks və Qonsalu Ramosa üstünlük verib. Hər iki futbolçu həmin görüşdə qol vurub.