Ötən ay kartof ixracı 8,4 dəfədən çox artıb

Bu ilin yanvar-aprel ayları ərzində ölkədən 3 475,7 min ABŞ dolları dəyərində 7 777,82 ton kartof ixrac olunub.

"Operativ Media" xəbər verir ki, "vergiler.az"ın Dövlət Gömrük Komitəsinin hesabatı əsasında apardığı hesablamalara görə, bu, 2022-ci ilin eyni göstəriciləri ilə müqayisədə dəyər olaraq 65,1 faiz (1 370,97 min dollar), həcm olaraq isə 70,8 faiz (3 225,38 ton) çoxdur.

Cari ilin mart ayına nisbətdə isə apreldə kartofun ixrac dəyəri və həcmi 8,4 dəfədən çox artaraq müvafiq olaraq 2 943,23 min dollar və 6 612,86 ton təşkil edib.

Qeyd edək ki, 2023-cü ilin ilk dörd ayında kartofun ümumi ixracda xüsusi çəkisi 0,03 faizə, qeyri-neft məhsullarının ixracında çəkisi isə 0,29 faizə bərabər olub.