Azərbaycan millisinin futbolçusu Musa Qurbanlı yeni komandası “Yurqarden”ə hələ də qoşulmayıb.

"Operativ Media" xəbər verir ki, bunu İsveç klubunun idman direktoru Bosse Andersson açıqlayıb. Onun sözlərinə görə, Qurbanlı və digər transfer Feliks Vanın bütün sənədləşmə işləri qaydasında olsa, onlar həftəsonundan etibarən məşqçilər korpusunun sərəncamında olacaqlar.

Andersson əlavə edib ki, sənədləşmə prosesi hətta iyulun 17-nə çatsa belə, Qurbanlı məşq etmədən həmin gün ilk rəsmi matçına çıxa bilər: “Planımız Musa Qurbanlı və Feliks Vanın həftəsonu düşərgəyə qoşulması və bazar ertəsi “Malmö” ilə böyük oyunda meydana çıxmasıdır. Ümid edirik ki, sənədləri vaxtında qaydasına salacağıq. Oyunçular hətta məşqsiz də çempionat matçına çıxa bilərlər”.

Qeyd edək ki, “Qarabağ”dan transfer edilən Musa Qurbanlı “Yurqarden”lə 3 illik müqavilə imzalayıb. İyulun 17-də “Malmö” ilə ev görüşü Bakı vaxtı ilə saat 21:00-da başlayacaq