Zaxarova: "Londonun yeni sanksiyaları ikiüzlülüyün təzahürü kimi qəbul edilir"

"Londonun Rusiya vətəndaşlarına və təşkilatlarına qarşı yeni sanksiyaları açıq-aşkar ikiüzlülük nümayişindən başqa bir şey deyil və bu, Londonun xarici siyasətinin əlamətdar xüsusiyyətinə çevrilib".

"Operativ Media" xəbər verir ki, bunu Rusiya Xarici İşlər Nazirliyinin sözçüsü Mariya Zaxarova deyib. 

“Biz Londonun açıq-aşkar düşmən hərəkətlərini Britaniyanın xarici siyasətinin əlamətdar xüsusiyyətinə çevrilmiş ikiüzlülüyün yeni təzahürləri kimi qiymətləndiririk”, - o, qeyd edib.

Zaxarovanın sözlərinə görə, heç bir sanksiya Rusiyanı suveren kursunu dəyişməyə məcbur edə bilməz: "Xüsusi hərbi əməliyyatın tapşırıq və məqsədlərinə tam nail olunacaq".

Qeyd edək ki, Böyük Britaniya Xarici İşlər Nazirliyi bazar ertəsi günü 13 Rusiya vətəndaşına və Krımdakı Artek beynəlxalq uşaq mərkəzinə sanksiya tətbiq etdiyini açıqlayıb. Giriş qadağası və aktivlərin dondurulmasını əhatə edən məhdudiyyətlər təhsil naziri Sergey Kravtsov, mədəniyyət naziri Olqa Lyubimova, Kamçatka vilayətinin qubernatoru Vladimir Solodov, Adıgey Respublikasının qubernatoru Murat Kumpilov və Xarkov vilayətinin "hərbi-mülki administrasiyası"nın rəhbəri Vitali Qançevi əhatə edir.