Türkiyə-Yunanıstan-İngiltərə Şərqi Aralıq dənizində birgə təlim keçirib

2020-ci ilin yayında Şərqi Aralıq dənizində artan gərginlikdən sonra qarşıdurma səviyyəsinə gələn Türkiyə və Yunanıstan hərbi gəmiləri 3 ildən sonra NATO çətiri altında birgə təlim keçirib.

"Operativ Media" xəbər verir ki, Türkiyədən “TCG Gökçeada”, Böyük Britaniyadan “HMS Duncan” və Yunanıstandan “HS Limnos” gəmisi NATO-nun Daimi Dəniz İşçi Qrupu-2 çərçivəsində təlimlər keçirib.

Türkiyə Milli Müdafiə Nazirliyinin sosial mediada verdiyi açıqlamada bildirilib ki, NATO çətiri altında keçirilən təlim çərçivəsində üç ölkənin hərbi gəmiləri mümkün hava hücumlarına qarşı əməkdaşlıq ssenariləri üzərində işləyib.

Yunanıstanın “Kathimerini” qəzeti bu barədə məlumatında qeyd edib: “Təlim Türkiyə-Yunanıstan münasibətlərində hərbi əməkdaşlığı inkişaf etdirmək səylərini və NATO-nun buna yardım etmək istəyini əks etdirdi”.