“Əl Nəsr” Ərəb Çempionlar Kubokunun qalibi olub. Finalda “Əl Nəsr” “Əl Hilal”la yarışıb və 2:1 hesabı ilə qalib gəlib.
"Operativ Media" xəbər verir ki, 38 yaşlı portuqaliyalı hücumçu Kriştiano Ronaldo dubla imza atıb.
51-ci dəqiqədə "Əl Hilal"ın braziliyalı hücumçusu Maykl oyunda hesabı açıb. Ronaldo 74-cü dəqiqədə bərabərliyi bərpa edib. Mübarizə əlavə vaxta keçirilib. Qələbə qolunu da 98-ci dəqiqədə Ronaldo vurub.
İkinci hissənin sonunda “Əl Nəsr”in futbolçuları Abdulela Əl-Əmri və Navaf Əl-Buşal meydandan qovulub.
115-ci dəqiqədə Ronaldo dizindən aldığı zədə səbəbindən əvəzlənib.
“Əl Hilal”da yeni gələn seneqallı müdafiəçi Kalidu Kulibali, portuqaliyalı yarımmüdafiəçi Ruben Neveş, serbiyalı yarımmüdafiəçi Sergey Milinkoviç-Saviç, braziliyalı hücumçu Malkom da oyunda iştirak edib.
“Əl Nəsr”də yeni gələn seneqallı hücumçu Sadio Mane, xorvatiyalı yarımmüdafiəçi Marselo Brozoviç də iştirak edib.
