Azərbaycanda hər 5 sahibkarın biri qadındır - Vüsal Qasımlı

Bu gün Azərbaycanda hər 5 sahibkarın biri qadındır. Ölkədə həm Ağdam, həm "Araz Vadisi İqtisadi Zona" Sənaye Parkında, həm də texnoparklarda və aqroparklarda qeydiyyatdan keçən sahibkarların bir qismi qadın sahibkarlardır.

"Operativ Media" xəbər verir ki, bunu İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı Azərbaycan Qadınlarının VI qurultayında çıxışı zamanı deyib.

O qeyd edib ki, qadınların sahibkarlıq fəaliyyətinə dövlətin böyük ümidləri var.

“Hazırda Qarabağda və Şərqi Zəngəzurda təhsil və səhiyyə sektorunda, eləcə də, məşğulluqda qadınlar böyük paya malikdirlər".

Qeyd edək ki, Ulu Öndər Heydər Əliyevin 100 illik yubileyinə həsr olunmuş Azərbaycan Qadınlarının VI Qurultayı keçirilir.

Azərbaycanın bütün regionlarından olan 600-ə yaxın qadının bir araya gəldiyi Azərbaycan Qadınlarının VI Qurultayı ölkəmizdə qadın hərəkatının əsasını qoymuş Ümummilli lider Heydər Əliyevin 100 illik yubileyi, eyni zamanda ilk Qadın Qurultayının 25 ili münasibətilə baş tutur.

Türkiyə, Özbəkistan və Tacikistan Respublikalarının dövlət rəsmilərinin də qatılacağı Qurultayda millət vəkilləri, dövlət və qeyri-hökumət, eləcə də beynəlxalq təşkilatların və xarici dövlətlərin ölkəmizdəki səfirliklərinin, o cümlədən respublikanın bütün regionlarından nümayəndələr, görkəmli ictimai-siyasi xadimlər iştirak edəcək, qeyd edilən məsələləri müzakirə edərək, təkliflərini diqqətə çatdıracaqlar.