Yaxın 3 ildə Özbəkistanın dövlət borcunun nə qədər olacağı açıqlanıb

2024-cü ildə Özbəkistanın dövlət borcunun ümumi daxili məhsulun (ÜDM) 37 faizini təşkil edəcəyi gözlənilir.

"Operativ Media" xarici KİV-ə istinadən xəbər verir ki, bu barədə Özbəkistanın İqtisadiyyat və Maliyyə Nazirliyinin təqdim etdiyi 2024-2026-cı illər üçün büdcədə məlumat verilib.

2023-cü il iyulun 1-nə Özbəkistanın dövlət borcunun həcmi 31,5 milyard dollar təşkil edib ki, bu da ÜDM-in 36,8%-nə bərabərdir. Dövlətin xarici borcu 25,9 milyard dollar, daxili borcu isə 5,6 milyard dollar olub. 

Büdcədə təqdim olunan ilkin təhlillərdə göstərilir ki, makroiqtisadi və fiskal göstəricilərin sabitliyi təmin olunarsa, dövlət borcunun ÜDM-ə nisbəti 2024-cü ildə 37 faiz, 2025-ci ildə 37,4 faiz, 2026-cı ildə isə 37,9 faiz civarında olacaq. Gözləntilərə görə, ölkənin ümumi daxili məhsulu 2024-cü ildə 100 milyard dollardan, 2025-ci ildə 125 milyard dollardan, 2026-cı ildə isə 140 milyard dollara yüksələ bilər.