Bazarda satılan, şadlıq evlərində verilən kürü haradan gətilir? - ARAŞDIRMA

Artıq Azərbaycanda Xəzər kürüsü tapmaq müşkülə çevrilib. Bir zamanlar dünya bazarlarında "premium" hesab edilən qara kürü indi bazarlarda yoxdur. Saxta kürü isə hazırda ən çox satılanlar arasındadır. 

"Operativ Media" bazarlarda satılan balıq kürülərinin qiymətini və keyfiyyətini araşdırıb. 

Dəniz məhsullarının satışı ilə məşğul olan Nadir Babayev deyir ki, hazırda bazarda tələbat olan kürülər Rusiyadan gətirilən kürülərdir. Kamçatkadan gətirilən kürünün yarım kiloqramı 125 manatdır. 

"Xəzər dənizinin qara kürüsünün satışına icazə verilmir. Yalnız xüsusi təsərüffatlarda yetişdirilən, lisenziyalı şirkətlərdən alındıqda icazə var. 100 qramı 340 manatdan başlayan kürüyə yerli bazarda tələbat azdır deyə çox az satış məntəqəsində tapmaq olur".

Nadir Babayevin sözlərinə görə, şadlıq saraylarında və bəzi restoranlarda verilən kürülərin mənşəyi bəlli deyil. Əsl kürünü seçməyin isə sadə qaydaları var. 

"O kürü deyil. Necə düzəldilir, hardan gətirilir bilinmir. Məlumatlı müştəri də heç vaxt onu almaz. Kürünü dadan bilir ki, təmiz kürüdür, ya yox. Kürü ələ yapışmamalıdır. Kürüyə diqqətlə baxanda qara nöqtə görülür. Ona balığın gözü deyirlər. Alanda mütləq ona fikir versinlər".