Soyuq havalarda avtomobili işə salarkən mühərriki nə qədər qızdırılmalıdır?

Havaların soyuması ilə sürücülər üçün hər zaman aktual olan bir məsələ yenə gündəmdədir. Soyuq havalarda avtomobilin mühərrikini qızdırmadan sürmək olarmı?

“Operativ Media”ya açıqlama verən avtomobil ustası Dəniz Ağabəyli deyir ki, birmənalı şəkildə mühərrik qızdırılmalıdır.

“Benzin mühərrikli avtomobilləri işə salanda mühərrik 15 000-20 000 dövrlər sayında işləyir. Dövrlər sayı aşağı düşdükdən sonra sürmək olar. “Avtopasos” aşağı endikdə artıq sürücü mühərrikin səsindən bunu hiss edir. Yalnız bundan sonra hərəkətə başlamaq olar. Dizel mühərrikli avtomobilləri isə 3-5 dəqiqə intervalında işlək vəziyyətdə saxlamaq lazımdır”.

Dəniz Ağabəyli deyir ki, mühərriki qızdırmadan avtomobili idarə etmək sürücünü xərcə sala bilər.

“Mexaniki ötürücü transmissiyalı avtomobilləri isə yerində biraz artıq işlətmək lazımdır. Əks halda mexaniki sürətlər qutusu tam ötürmür. Ötürücü keçidlərdə boğulmalar ola bilər. Ona görə də bir az artıq qızdırmaq lazımdır. Qızdırmadan sürdükdə dizel mühərrikli avtomobillər çox səsli işləyir və gedişlərdə fərq edir. Benzin mühərrikli avtomobillərdə isə mühərrikdə aşınmalar baş verir. Mühərrikin içərisində yeyilmə gedir. Bununla yanaşı yanacaq sərfiyyatında çoxalma özünü göstərir”.