"Azərbaycan baza ili ilə müqayisədə 2030-cu ilə qədər istilik effekti yaradan qaz emissiyalarının 35 faiz, 2050-ci ilə qədər isə 40 faiz azaldılmasını hədəf kimi götürüb".
Bunu "Operativ Media"ya açıqlamasında yaşıl enerji layihələri üzrə menecer Aqil Ömərli deyib.
Aqil Ömərli bildirib ki, Azərbaycan elektrik enerjisi istehsalının qoyuluş gücündə bərpa olunan enerji mənbələrinin payının 2030-cu ilə qədər 30 faizə çatdırılmasını hədəfləyir.
"Azərbaycanın 2030-cu ilə qədər sosial-iqtisadi inkişafa dair beş milli prioritetindən biri "Təmiz ətraf mühit və yaşıl artım ölkəsi" kimi müəyyən edilmişdir. Digər tərəfdən də bütün inkişaf strategiyaları da sürətli iqtisadi inkişafın ətraf mühitlə bağlı neqativ təsirlərinin mümkün qədər az olmasının paralel getməsi ilə bağlıdır".
Aqil Ömərlinin sözlərinə görə, gələn il noyabr ayında BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası kimi mötəbər tədbirin ölkədə keçirilərək on minlərlə insanın Bakıda bir araya gəlməsi ilə bəşəriyyətin qlobal ekoloji problemi olan iqlim dəyişikliyi ilə bağlı məslələrin müzakirəsi də nəzərdə tutulur.
"Ümumiyyətlə qeyd etmək lazımdır ki, iqlim dəyişikliyi ilə bağlı hər iki istiqamətin biri yəni iqlim dəyişmələrinə təsirlərin azaldılması, eyni zamanda iqlim dəyişmələrinin fəsadlarına uyğunlaşmadır. Hər iki çox vacib məqam üzrə də heç bir ölkə tək başına effektiv nəticə ala bilməz. Məhz həmrəylik ilinin elan olunması da iqlimə birgə əməkdaşlıq çərçivəsində mübarizə aparmaq olar".