Azərbaycan Mərkəzi Bankı uçot dərəcəsini 8%-dən 7.75%-ə endirib. Məlumata görə, faiz dəhlizinin aşağı həddi 6.5%-dən 6,25%-ə, faiz dəhlizinin yuxarı həddi isə 9%-dən 8.75%-ə endirilib.
Bəs uçot dərəcəsinin endirilməsi nə ilə əlaqədardır?
Bu barədə iqtisadçı ekspert Xalid Kərimli "Operativ Media"ya açıqlama verib.
O qeyd edib ki, Mərkəzi Bank faiz dərəcələrini aşağı salmaqla ölkədə iqtisadi aktivlikdə rol almaq istəyir:
"Mərkəzi Bankın faiz dərəcəsinin aşağı endirilməsinin əsas səbəbi kimi ölkədə 12 aylıq inflyasiyanın aşağı düşməsi göstərilib. Görünən odur ki, Mərkəzi Bank inflyasiyanın daha da aşağı düşməsində o qədər maraqlı deyil və buna görə də manatın faiz dərəcəsini aşağı salmaqla inflyasiyanın kəskin azalmasına mane olmaq istəyir. Eyni zamanda həm də iqtisadi aktivliyi dəstəkləmək istəyir ki, faiz dərəcələri aşağı enərək kredit bazarında fəallıq artsın. Xüsusən də inflyasiyanın tempinin aşağı düşməsində 2 məqam var. Bunun bir səbəbi dünyada baş verən proseslərdir ki, əmtəə qiymətləri indeksi son 12 ayda 18,9 faiz aşağı düşüb. Ərzaq qiymətləri indeksi 10, 1 faiz azalıb və bir də manat dollara fiksə edildiyinə görə, manat dollarla bir yerdə Azərbaycanın digər ticari partnyorlarının valyutasına nisbətdə 19,3 faiz bahalaşıb. Bütün bu amillər bir yerdə, həm dünyada ərzaq və əmtəə qiymətlərinin aşağı düşməsi, həm manatın nominal faiz dərəcəsinin artması inflyasiyanı və inflyasiya gözləntilərini aşağı salıb".
Ekspert bildirib ki, Mərkəzi Bank da faiz dərəcəsini aşağı salaraq faizlə borc aldığına görə bir növ öz faiz xərclərini azaltmaq istəyir:
"Çünki o, qiymətli kağızlar bazarında notlar buraxır və elan etdiyi faiz dərəcələrinə uyğun olaraq qısamüddətli notlarına investisiya qoyan subyektlərə faiz ödəyir. Bununla yanaşı, həm də bazarın daha da aktivləşməsinə də təsir etmək istəyir. Amma bir nüans var ki, çox təəssüf ki, hələ də Mərkəzi Bankın apardığı faiz siyasətinin transmissiyası sürətli deyil, bir qədər aşağıdır. Misal üçün, Mərkəzi Bank son bir neçə aydır faiz dərəcələrini aşağı salır. Amma biz iri kommersiya banklarının öz faizlərinin artırılması meyllərini müşahidə edirik. Bu məqamlar hələ də Mərkəzi Bankın həll etməli olduğu məsələlərdir, amma ümumi şəkildə faiz dərəcələrinin aşağı salınması iqtisadiyyat üçün pozitiv siqnaldır".
Sevinc İbrahimzadə
