Azərbaycan və Özbəkistan turizmin inkişafı üçün anlaşma memorandumu imzalayıb

Özbəkistanın “Milli PR-mərkəz” dövlət unitar müəssisəsi Azərbaycanın Turizm Bürosu ilə Anlaşma Memorandumu imzalayıb.

Operativ Media xəbər verir ki, memorandumun imzalanması Özbəkistanın turizm komitəsinin sədri Ümid Şadiyev və Azərbaycan Dövlət Turizm Agentliyinin sədr müavini Azadə Hüseynova arasında Səmərqənd şəhərində keçirilən görüşün gedişində baş tutub.

Sənəd Böyük İpək Yolu üzrə vahid turizm marşrutunun inkişaf etdirilməsinə hədəflənib.

Danışıqların gedişində tərəflər turizm sahəsinin hazırkı vəziyyətini, əməkdaşlıq perspektivlərini və müştərək turizm təşəbbüslərinin inkişaf etdirilməsini müzakirə ediblər.

Əməkdaşlığın əsas məqsədi “Joint Silk Road Highlights Tour” təşəbbüsü çərçivəsində iki ölkənin turizm resurslarının birləşdirilməsidir. Layihə Mərkəzi Avropa ölkələrində, İpək Yolu üzərində yerləşən əsas tarixi məkanlarda, o cümlədən, Bakı, Şamaxı, Şəki, Xivə, Buxara və Səmərqənddə birgə turizm marşrutlarının təşviqini nəzərdə tutur.
 

Memorandum çərçivəsində tərəflər, həmçinin, birgə B2B tədbirləri, yol şouları (roadshow) və beynəlxalq turizm sərgilərində iştiraka dair razılığa gəliblər.

Sənədin imzalanmasından sonra Azərbaycan nümayəndə heyəti Səmərqənd Turizm Akademiyasını ziyarət edib, burada qonaqlar tədris proqramları, infrastruktur və turizm sahəsində kadr hazırlığı perspektivləri ilə tanış olublar.

İpək Yolunun mərkəzi hissəsində yerləşən aparıcı turizm istiqamətləri kimi Özbəkistan və Azərbaycan daha çox turist cəlb etmək, tarixi məkanların tanıdılmasını artırmaq və qlobal turizm bazarında mövqelərini gücləndirmək məqsədilə strateji tərəfdaşlıq qururlar.

Memorandumun imzalanması iki ölkə arasında turizm əlaqələrinin möhkəmləndirilməsinin əhəmiyyətini vurğulayır və sahənin gələcək inkişafı üçün yeni imkanlar açır.