Ötən il ölkənin qoruq və mədəniyyət müəssisələrini 460 min 331 əcnəbi ziyarət edib

Qoruqları İdarəetmə Mərkəzinin tabeliyindəki qoruqları və mədəniyyət müəssisələrini 2024-cü ildə bilet alaraq ziyarət edənlərin sayı 663 min 459 nəfər (460 min 331 nəfəri xarici vətəndaş, 203 min 128 nəfər Azərbaycan vətəndaşı) təşkil edib.

Operativ Media xəbər verir ki, bunu Dövlət Turizm Agentliyinin Qoruqları İdarəetmə Mərkəzi İdarə Heyətinin sədri Murad Ağabəyli jurnalistlərə açıqlamasında deyib.

Onun sözlərinə görə, əvvəlki illərdən fərqli olaraq, 2024-cü ildə qoruqları və mədəniyyət müəssisələrini ziyarət edənlərin 70 faizi əcnəbil olub:

“Bununla da 2023-cü illə müqayisədə xarici turistlərin sayında 48 faiz artım müşahidə olunub. Qeyd edək ki, məktəblilər, əlilliyi olan şəxslər, müharibə veteranları, şəhid ailələri, 12 yaşınadək xarici turistlər qeyd edilən kompleks, qoruq və muzeylərə ödənişsiz giriş haqqına malikdirlər. 2024-cü il ərzində ödənişsiz giriş haqqı olan 107 min 213 nəfər müvafiq kompleks, qoruq və muzeyləri ziyarət edib”.

Sədr əlavə edib ki, 2025-ci ilin ilk üç ayı ərzində Qoruqları İdarəetmə Mərkəzinin tabeliyindəki qoruqları və mədəniyyət müəssisələrini, o cümlədən “Yanardağ” Dövlət Tarix-Mədəniyyət və Təbiət Qoruğu, “Atəşgah Məbədi” Dövlət Tarix-Memarlıq Qoruğu, “Yuxarı Baş” Milli Tarix-Memarlıq Qoruğu, Şəki Dövlət Rəsm Qalereyası, “Kiş” Tarix-Memarlıq Qoruğu, “Basqal” Dövlət Tarix-Mədəniyyət Qoruğu, Lahıc Tarix Diyarşünaslıq Muzeyi, “Diri baba” türbəsi və Palçıq Vulkanları Turizm Kompleksini ümumilikdə 123 min 761 xarici, 30 min 430 yerli turist bilet alaraq ziyarət edib:

"2025-ci ilin birinci rübünün bu göstəriciləri əvvəlki ilin müvafiq dövrü ilə müqayisədə ümumi turistlərin sayında 73 faiz, sadəcə, xarici turistlərin sayında isə 99 faiz artım deməkdir”.