Rusiya Xarici İşlər nazirinin müavini Sergey Verşinin, BMT-nin Livan üzrə xüsusi koordinatoru Janin Henis-Plassxart ilə görüş keçirib.

Operativ Media xəbər verir ki, bu barədə Rusiya Xarici İşlər Nazirliyi görüşün yekunlarına dair yaydığı rəsmi məlumatda bildirib

Görüşdə Livandakı vəziyyət, humanitar yardım məsələləri və regionda sabitliyin təmin olunması istiqamətində atılacaq addımlar müzakirə olunub.

Tərəflər arasında aparılan məsləhətləşmələr zamanı Livanda yerli səviyyədə gərginliyin azaldılması, zərərçəkmiş əhaliyə kompleks humanitar yardımın göstərilməsi, zorakılığın yenidən baş verməsinin qarşısının alınması və ölkədə daxili siyasi birliyin möhkəmləndirilməsi məsələləri diqqət mərkəzində olub.  

Bundan əlavə, BMT Təhlükəsizlik Şurasının 1701 saylı qətnaməsi də daxil olmaqla, əsas beynəlxalq sənədlərin yerinə yetirilməsinin vacibliyi vurğulanıb.

Həmçinin, Livanın suverenliyi, müstəqilliyi, siyasi birliyi və ərazi bütövlüyünə hörmətin beynəlxalq hüququn əsas prinsipləri çərçivəsində qorunmasının önəmi qeyd edilib.

Görüş zamanı diplomatlar BMT-nin Livandakı ölkə komandası və BMT-nin Livanda Müvəqqəti Sülhməramlı Qüvvələrinin (UNIFIL) fəaliyyəti ilə bağlı məsələləri də nəzərdən keçiriblər.

Rusiya tərəfi bu qurumların mandatına dəyişməz dəstəyini bir daha təsdiq edib.