Papa Fransiskin ölümündən sonra sosial mediada fırıldaqçılar fəallaşıb. Onlar saxta xəbər başlıqları və zərərli fişinq keçidləri vasitəsilə istifadəçiləri aldadaraq bank kartı məlumatlarını ələ keçirməyə çalışırlar.
Operativ Media xəbər verir ki, bu barədə məlumatı “Politico” nəşri yayıb.
Məlumata görə, fırıldaqçılar “Papa Fransiskin ölmədiyi” ilə bağlı saxta xəbər məzmunları hazırlayaraq sosial mediada paylaşırlar.
Məlumatlarda Papa ilə bağlı yayılan ölüm xəbərlərinin internet trafikini artırmaq üçün uydurulduğu iddia edilir.
Saxta xəbərlərin daha inandırıcı görünməsi üçün isə onun şəkil və videolarından istifadə olunur.
Bundan əlavə, fişinq keçidlərində “xeyriyyə məqsədli” ianələr üçün guya Vatikan tərəfindən təşkil olunan pul köçürmələri ilə bağlı elanlar yerləşdirilir.
Bu linklər əsasən “TikTok” və “Instagram” kimi sosial şəbəkələr vasitəsilə geniş şəkildə yayılır.
Mütəxəssislər istifadəçiləri diqqətli olmağa çağırır və tanımadıqları mənbələrdən gələn keçidlərə daxil olmamağı, xüsusilə şəxsi və maliyyə məlumatlarını paylaşmamağı tövsiyə edirlər.
