Ukraynada fəaliyyət göstərən dövlətlərin və beynəlxalq təşkilatların diplomatik nümayəndələri Kiyevdə ballistik raket zərbəsinin endirildiyi ərazini ziyarət ediblər.

Operativ Media xəbər verir ki, bu barədə Ukrayna Prezidenti Volodimir Zelenski sosial şəbəkə hesabında paylaşım edib.

Dövlət başçısı bildirib ki, sözügedən raket hücumu nəticəsində 12 nəfər həlak olub, bir sıra yaşayış binaları tamamilə dağıdılıb.

“Xilasetmə əməliyyatı bu yaxınlarda başa çatıb. Səfirliklərin 50-dən çox nümayəndəsi, eləcə də beynəlxalq təşkilatların nümayəndələri bu gün bizimlə birgə qurbanların xatirəsini yad etdilər. Rusiyanın ballistik raketləri ilə dinc sakinlərə hücum etdiyini bütün diplomatlar öz gözləri ilə gördülər”, – deyə Zelenski paylaşımında qeyd edib.

Prezident, həmçinin Ukraynanın yanında olan bütün dövlətlərə təşəkkürünü bildirib:

“Avropa, Latın Amerikası, Afrika, Asiya, Avstraliya və Sakit okean regionu, Şimali Amerika bizə dəstək olan bütün tərəfdaşlara, həmçinin dövlətimizə kömək edən və ukraynalıları dəstəkləyən bütün beynəlxalq təşkilatlara təşəkkür edirəm.”