"Sabah” və Macarıstanın “Honved” klubu arasında əməkdaşlıq müqaviləsi imzalandı

Bu gün Azərbaycan və Macarıstan milli komandaları arasında keçirilən yoldaşlıq oyunundan öncə “Sabah” Futbol Klubu və Macarıstanın köklü klublarından biri olan “Honved” FK arasında rəsmi əməkdaşlıq müqaviləsi imzalanıb.

Operativ Media xəbər verir ki, tərəflər arasında razılaşdırılmış əməkdaşlıq çərçivəsində bir sıra sahələr üzrə birgə fəaliyyət planlaşdırılır. Bunlara məşqçi heyətinin qarşılıqlı təcrübə mübadiləsi, müxtəlif yaş qrupları üzrə yoldaşlıq görüşlərinin təşkili, gənclər üçün beynəlxalq turnirlərdə qarşılıqlı iştirak, eləcə də futbolçuların mübadiləsi və inkişafına yönəlmiş proqramlar daxildir. Eyni zamanda, hər iki klubun məşqçiləri və oyunçuları üçün təlim və seminarların keçirilməsi nəzərdə tutulur.

Əməkdaşlığın əsas məqsədi – Azərbaycan və Macarıstan futbolu arasında əlaqələri daha da inkişaf etdirmək, futbolun inkişafına töhfə vermək, peşəkar bilik və təcrübə paylaşımı ilə gənc futbolçuların yetişdirilməsinə şərait yaratmaqdır.