Ermənistan və Azərbaycan arasında sülh sazişi yeni səhifə aça bilər.

Operativ Media xəbər verir ki, Fransa Prezidenti Emanuel Makron Ermənistan və Azərbaycan arasında imzalanması gözlənilən sülh sazişi ilə bağlı açıqlama verib.

Dövlət başçısı bildirib ki, bu saziş təkcə tərəflər üçün deyil, bütövlükdə region ölkələri və hətta regiondan kənardakı dövlətlər üçün də mühüm imkanlar yarada bilər.

“Ermənistan və Azərbaycan arasında sülh sazişinin imzalanması regionun bütün xalqları və ölkələri, eləcə də onun hüdudlarından kənarda olanlar üçün yeni səhifə aça bilər”, – deyə Makron qeyd edib.

Xatırladaq ki, ABŞ-nin Türkiyədəki səfiri Tom Barrak bildirmişdi ki, ABŞ iki Qafqaz ölkəsi arasında uzun müddətdir dalana dirənmiş diplomatik danışıqların irəliləyişinə nail olmaq məqsədilə Ermənistan və Azərbaycan arasında planlaşdırılan nəqliyyat dəhlizinə nəzarəti öz üzərinə götürməyi təklif edib.