Qlobal su-bataqlıq ərazilərin itirilməsi 2050-ci ilə qədər 39 trilyon dollar iqtisadi itkiyə səbəb ola bilər

Su-bataqlıq ərazilərin qorunmasına dair Ramsar Konvensiyası kimi tanınan Sazişin Katibliyi “2025-ci il üzrə Sulak Ərazilərin Qlobal Vəziyyəti: Sulak Ərazilərin Dəyəri, Qorunması və Maliyyələşdirilməsi” adlı hesabat dərc edib.

Operativ Media xəbər verir ki, su-bataqlıq ərazilərin itirilməsi və bu meylin qarşısını almaq üçün görülməsi vacib olan tədbirlərə dair elmi və iqtisadi əsaslı məlumatların təqdim olunduğu hesabatda qeyd edilir ki, su, qida, dolanışıq vasitələri və iqlim davamlılığı təmin edən su-bataqlıq ərazilər narahatedici sürətlə yoxa çıxmaqdadır.

Hesabatda 1970-ci ildən bu günə qədər torf sahələri, çay və göl kimi şirin su ekosistemləri, habelə manqrov meşələri və mərcan rifləri kimi sahilyanı dəniz ekosistemlərini əhatə edən sulak ərazilərin təxminən 22 faizinin məhv edildiyi vurğulanıb.

Dünya üzrə su-bataqlıq ərazi itkisinə dair ümumi göstəricinin 411 milyon hektara çatdığı bildirilib. Qeyd olunub ki, mövcud su-bataqlıq ərazilərin dörddə biri isə artıq deqradasiyaya uğramış vəziyyətdədir.

Əgər hazırkı itki sürəti ilə davam edərsə, 2050-ci ilə qədər qalan su-bataqlıq ərazilərin daha 20 faizinin məhv olacağı və bunun nəticəsində təxminən 39 trilyon dollar dəyərində iqtisadi itkinin baş verəcəyi qeyd olunub.

Hesabatda su-bataqlıq ərazilərin məhv olmasının başlıca səbəbləri arasında kənd təsərrüfatı sahələrinin genişləndirilməsi, çirklənmə, invaziv növlər, iqlim dəyişikliyinin səbəb olduğu quraqlıq və dəniz səviyyəsinin qalxması kimi amillər göstərilib.