ABŞ prezidenti Donald Tramp Qəzza zolağında atəşkəsin heç bir təhlükəsi olmadığını bildirib.
Operativ Media xəbər verir ki, Yaponiyadan Koreya Respublikasına gedərkən təyyarədə jurnalistlərə açıqlama verən Tramp söyləyib ki, əgər İsrail qoşunlarına atəş açılarsa, Fələstin anklavında hərbi əməliyyatların bərpasına icazə veriləcək.
“Onların bunu etmək hüququ var”, — deyə ABŞ prezidenti əlavə edib. Onun fikrincə, Qəzzada atəşkəs üçün real təhlükə yoxdur: “Heç nə [anklavda atəşkəsə] təhlükə yaratmayacaq”, — Tramp bildirib.
ABŞ lideri həmçinin deyib ki, Yaxın Şərqdə və onun hüdudlarından kənarda bir çox ölkə Həmasın Qəzzada atəşkəs rejimini pozacağı təqdirdə ona qarşı tədbir görməyə hazırdır. Trampın sözlərinə görə, Həmas “Yaxın Şərqdə dünyanın çox kiçik bir hissəsidir” və “özünü düzgün aparmasa”, hərəkat məhv ediləcək. “Əgər lazım gəlsə, biz Həması çox asanlıqla aradan qaldıracağıq. Bu, Həmasın sonu olacaq”, — o bildirib. ABŞ hadisələrin belə bir ssenari üzrə inkişaf etməməsini üstün tutur. Məlumata görə, o həmçinin “bir çox ölkələrin”, o cümlədən “oynamamalı olduğunuz güclü ölkələrin” Həmasa qarşı hərəkətə keçməyə hazır olduğunu söyləyib.
